A Unidade Esculta (14-17 anos) do Grupo Scout Vasco da Ponte 636 de Ferrol, atópase rematando o proxecto no que se embarcou durante este curso. Tratábase de realizar unha labor de recollida de alimentos, xoguetes e roupa para entregar en diversas entidades benéficas de Ferrol. Baixo o lema “O Nadal remata pero a necesidade non”, puxéronse mans á obra e dende xaneiro repartiron caixas en diferentes establecementos da comarca, como os Clubes de Danza Esquío e Matilde Pedreira, o Colexio de San Xoan de Filgueira, a Escola Oficial de Idiomas, o Conservatorio Municipal de Música, os IES Sofía Casanova, Canido, Saturnino Montojo e Terra de Trasancos , o Ximnasio Renbu-Kan, Club Narón de Tenis de Mesa e o Local Social “A Solaina” de Narón (aos que desde aquí queremos transmitir o noso máis sinceiro agradecemento pola súa colaboración).
Tras varios meses xestionando todas as caixas e almacenando todo o material chegou xuño, momento no que se retiraron as caixas e comezaron coa selección e limpeza de todo o recollido. Este pasado 16 de xullo fixeron o reparto do material que foi entregado ao Patronato Concepción Arenal e a Dignidad. O total recollido ascendeu a: Roupa home/neno – 86 quilos, Roupa muller/nena: 93 quilos, Roupa de abrigo ambos sexos: 243 quilos, Zapatos: 35 quilos, Xogos e xoguetes: 198 unidades, Comida: 200 quilos.
Dende o Equpo de Scouters (voluntarios adultos) da Unidade queremos felicitar a toda a sección por este magnífico traballo. Un proxecto que, coas súas dificultades, saíu para adiante e, como se ve, foi todo un éxito. Tan so nos agarda esperar a este vindeiro día 25 para avaliar e facer unha celebración de fin de proxecto por todo o alto… Que nervios!
