Metodoloxía Educativa
O Movemento Scout caracterízase por un método educativo propio. Consistente nun sistema de auto educación progresiva que concreta a metodoloxía en cada unha das etapas psico-evolutivas do desenvolvemento do individuo.
Educación en valores
A persoa establece libremente un compromiso propio ante os seus iguais, asumindo unha responsabilidade social, persoal, ética…
A Promesa e a Lei Scout como referencia voluntaria e compartida.
A educación pola acción
A aprendizaxe faise a través da observación, a experimentación e actividade persoal, permitindo ás persoas participantes realizar accións por si mesmas e adquirir experiencias únicas. Ponse en práctica a educación pola acción mediante a aplicación da metodoloxía do proxecto: educación activa e emprego do xogo como oportunidade óptima de experimentar, aventurar, imaxinar, soñar, proxectar, crear e recrear a realidade.
Aprender facendo: xogos e proxectos como motores pedagóxicos.
A vida en pequenos grupos
O pequeno grupo socializa, identifica aos seus membros cos obxectivos das actividades e permite profundizar no coñecemento mutuo. Todo elo posibilita a participación, a aprendizaxe e a asunción de responsabilidades. Créase así un espazo educativo e de confianza nun mesmo privilexiado para crecer e desenvolverse.
O pequeno grupo como motor de socialización, confianza e pertenza.
A asunción de responsabilidades
A vivencia da participación en diversas actividades, asumindo responsabilidades consigo mesmo e co grupo, axuda ao establecemento dun compromiso persoal libremente aceptado, no que se basea o éxito do equipo.
Compromiso persoal libremente aceptado no que se basea o colectivo.
A formación autoxestionada
A persoa participa no seu propio desenvolvemento, formando parte activa das diferentes etapas determinadas no Programa Educativo Scout.
Protagonismo directo no propio itinerario educativo persoal.
O contacto coa natureza
O descubrimento da natureza estimula a creatividade, crea vínculos entre os membros do equipo, favorece a comprensión da vida en sociedade e permite valorar a vida sinxela e os ritmos naturais.
A natureza como espazo privilexiado de aprendizaxe e vida sinxela.
Programas progresivos e atraíntes baseados nos centros de interese
A presentación de técnicas atraíntes que se aprenden executándoas permite estimular o desenvolvemento de aptitudes, motivar a futura vocación e colaborar na formación da persoa, aportando a seguridade que implica o manexo dunha destreza. A través deles e da variedade dos centros de interese, a mocidade relaciónanse co mundo, descobren as súas capacidades e as dos demais, o valor da cooperación e o espírito de equipo, descubrindo dun modo alegre o que poden facer xuntos.
Achega de destrezas e descubrimento alegre en equipo.
Co apoio de adultos
A presenza dun adulto capacitado, que se incorpora á vida do equipo propoñendo, revelando e axudando a descubrir, facilita o diálogo e a cooperación, invitando ao grupo a producir o mellor de si mesmo.
Educadores scouts voluntarios que acompañan e espertan o potencial.
Seccións Educativas
O itinerario educativo por etapas de desenvolvemento.
COLONIA
6 a 8 anos • CastoresO descubrimento do grupo e o afecto
No marco simbólico do Bosque, os castores aprenden a convivir en comunidade, a respectar o medio que os rodea e a dar os seus primeiros pasos na autonomía persoal a través do xogo cooperativo e a fantasía.
MANDA
8 a 11 anos • LobatosA convivencia na Selva de Seeonee
Inspirados nas ensinanzas do Libro das Terras Virxes, a manda medra e convive unida como unha gran familia feliz. A través de consellos de rocha, xogos de normas e pequenas cazas polo territorio, os seus integrantes aprenden a coidarse mutuamente, desenvolvendo a empatía, a solidariedade e a responsabilidade colectiva ao abeiro da Lei da Selva.
SECCIÓN SCOUT
11 a 14 anos • ScoutsAventura e o Sistema de Patrullas
Núcleo orixinal do movemento scout. A mocidade organízase en grupos chamados Patrullas os cales gozan de autonomía propia e onde cada persoa asume roles e responsabilidades rotativas. Xuntas coidan o seu material, deseñan e executan as súas propias aventuras e afianzan o seu compromiso persoal a través da Promesa Scout.
UNIDADE ESCULTA
14 a 17 anos • EscultasA autoxestión e a Empresa Esculta
Etapa de afirmación da identidade e sentido crítico. A unidade xestiona proxectos de gran envergadura (Empresas) concibidos, executados e avaliados polos propios participantes para profundizar xuntos na personalidade individual e no sentimento de grupo.
CLAN
17 a 21 anos • RoversProxecto de vida e servizo á sociedade
O cumio do programa educativo scout. As e os rovers centran os seus esforzos na súa progresión persoal a través de diversas ferramentas como o plan de avance individual (PAI). Desenvolven accións continuadas de voluntariado e servizo na comunidade, comprometidos co cambio social.
KRAAL
+21 anos • ScoutersO equipo de educadores voluntarios
Persoas adultas con formación continua no método scout que planifican, dinamizan e velan polo benestar, a seguridade e a calidade pedagóxica de cada grupo e actividade.
